Indoda, inkwenkwana, kunye nedonki
Aesop | eGrisi
Utata nonyana bahamba nedonki. Wonke umntu unento yokuthetha. Kwenzeka ntoni xa bezama ukubakholisa bonke?
Kwathi ke kaloku, indoda nonyana wayo babesa idonki labo emarikeni. ILanga lalishushu, nendlela yayinothuli.
Umhambi owayezihambela wababona waze wahleka. "Kutheni uhamba ngenyawo kodwa unedonki?" wabuza. "Omnye wenu kufuneka alikhwele!"
Ekuvile oku, indoda yakhwelisa unyana wayo edonkini.
Besahamba njalo, badlula kwamanye amadoda. Omnye wabo wafinga iintshiyi. "Jonga laa nkwenkwe ikhwele, kodwa uyise uhamba ngenyawo!”
Le ndoda yaziva ineentloni, yanceda unyana wayo ukuba ehle kwidonki, kwakhwela yena.”
Kungekudala, badibana nabafazi ababini. Omnye washukumisa intloko. "Lihlazo ke eli! Indoda ikhwele idonki kodwa inkwenkwana yayo kufuneka ihambe ngeenyawo."
Indoda yabonakalisa ukutyhafa. Yaphakamisa unyana wayo yamnyusa edonkini ukuze bakhwele bobabini.
Ukufika kwabo edolophini, abantu babekhomba kwaye basebeza, “Bakhohlakele! Balithwalisa ubunzima kakhulu noko idonki, nalo liyadinga ukuphumla!”
Utata nonyana wakhe baziva becaphukile, bobabini behla edonkini. Bengazi ukuba mabenze ntoni na.babophelela amanqina edonki baza bayithwala.
Bathe besawela ibholorho, isihlwele sahlanganisana, sihleka yaye sibakhomba. Idonki, isoyika ingxolo, yashukuma yaze yakhaba-khaba. Le nkwenkwana ayizange ibambisise, idonki yawela emlanjeni. Kuba iinyawo zalo zazibotshelelwe, zange likwazi ukuqubha.
Utata nonyana bothuka, balibukela idonki labo liinyamalala litshona emanzini.
Ixhego elalikufuphi nabo labona okwenzekileyo. Lashukumisa intloko lathi, "Ukuba uzama ukukholisa wonke umntu, uzophela ungakholisi namnye umntu.”
