Umvundla kunye nencanda
Grimm Brothers | eJamani
Ugezelwa ngenxa yemilenze yakhe emifutshane, incanda elikhalipha icela umngeni kugqatso nomvundla. Ingaba uya kuphumelela kumvundla?
Ngentsasa yangeCawa ngexesha lokuvuna, incanda yema emnyangweni wayo. Weva impepho epholileyo waza wantyiloza kancinane. Umfazi wakhe wayehlamba esomisa abantwana babo, wagqiba kwelokuba ahambe ayojonga izityalo zakhe. Kuba usapho lwakhe lwaluzitya oko, wayezigqala njengezibalulekileyo.
Wavala ucango lwakhe, waqalisa ukuya kwibala lakhe lezizityalo. Engahambanga mgama umde, wadibana nomvundla, owawuzijongele ikhaphetshu.
"Molo ngalentsasa!"ibulise yenjenje incanda.
Umvundla onekratshi, okrwada akazange awubuyise umbuliso. Endaweni yoko, wahlekisa esithi, “Kutheni uphume ngentsasa kangaka?”
“Ndiyazihambela nje,” yatsho incanda.
"Uyahamba?" wahleka umvundla. "Ngaloo milenze mifutshane? Kufuneka ufumane enye into eluncedo onokuyenza."
Incanda yamcela-umngeni, sele inomsindo. “Ucinga ukuba ungabaleka wodlule nam?
"Injalo!" wahleka umvundla.
“Masibaleke ke,” yatsho incanda. Bavumelana ukuba babalekele ingqekembe yegolide kunye nebhotile yebranti. Incanda yathi idinga isidlo sakusasa kuqala, kwaye iza kubuya emva kwesiqingatha seyure. Umvundla wavuma ukulinda.
Ekhaya, incanda yaxelela umfazi wayo malunga nogqatso.
"Ingaba uphambene?" wabuza. “Ungawushiya njani umvundla?”
“Ungakhathazeki,” watsho. Ndinecebo.
Bathi besahamba, wacacisa ,"Siza kubaleka kwimiqolo eyahlukileyo. Wena ume ekupheleni kowam.” Xa umvundla usondela, uvele ukhwaze`, “Sele ndilapha”.
Ebaleni, wabonisa umfazi wakhe indawo amakame kuyo waza waya kwindawo abazokuqala kuyo, apho wawulinde umvundla.
"Singaqala?" wabuza umvundla.
“Ewe,” yatsho incanda. "Zilungiselele!"
Umvundla wabala, “Inye, zimbini, zintathu,” wabaleka wemka. Incanda yabaleka yathathisa kancinci, emva koko yazimela.
Xa umvundla ufika esiphelweni, umfazi wencanda wakhwaza wathi, "Sele ndifikile!"
Emangalisiwe, umvundla awuzange uqonde ukuba ngumfazi wencanda kuba babefana.
Umvundla awuzange ukholelwe ukuba woyisiwe, ngoko waphinda wazingisa ukuba abaleke. Baphinda babaleka baphindela ngapha nangapha. Kodwa ngalo lonke ixesha, ilizwi lencanda lalikhwaza lisithi, “Sele ndifikile!” ukusuka ekupheleni komqolo. Wadinwa kakhulu umvundla wabhideka, kodwa wala ukunikezela. Emva kwemitsi emashumi asixhenxe anesine, imilenze yakhe yaphelelwa ngamandla waza wawa phantsi, edinwe eyimfe ukuba angaqhubeka.
Incanda yathatha inzuzo yayo yokuphumelela, yagoduka yonwabile nomfazi wayo. Ukususela ngaloo mini, akukho mvundla waphinda wacela-umngeni wogqatso kwincande.
